Atrof-muhitni muhofaza qilish, ishlab chiqarish va xizmat ko‘rsatish jarayonida hosil bo‘ladigan chiqindilarni to‘g‘ri boshqarish ekologik xavfsizlikni ta’minlashning muhim yo‘nalishlaridan biridir. Ayniqsa, avtomobillarga texnik xizmat ko‘rsatish jarayonida hosil bo‘ladigan ishlatilgan motor moylarini belgilangan tartibda yig‘ish, saqlash va utilizatsiya qilish tabiatga salbiy ta’sirlarning oldini olishda muhim ahamiyat kasb etadi.
Shu maqsadda O‘zbekiston Ekologik partiyasi Oltinko‘l tuman Kengashi tomonidan Oltinko‘l tumanining “Maqsad” mahallasida joylashgan usta G‘afforov Haydaraliga tegishli avtomobillarga xizmat ko‘rsatish ustaxonasida ekoreyd tadbiri o‘tkazildi.
Ekoreyd davomida avtomobillarga texnik xizmat ko‘rsatish va ta’mirlash jarayonida almashtiriladigan ishlatilgan motor moylarini yig‘ish, vaqtincha saqlash hamda ularni belgilangan tartibda utilizatsiya qilish holati o‘rganildi. Shuningdek, moy almashinuvi vaqtida hosil bo‘ladigan chiqindilarning atrof-muhitga ta’siri va ularni boshqarish tartiblariga e’tibor qaratildi.
Tadbir davomida ustaxona mas’ullariga ishlatilgan motor moylarini tuproq, ariqlar, suv havzalari yoki boshqa tabiiy muhitga tashlash mutlaqo mumkin emasligi tushuntirildi. Bunday chiqindilarni noto‘g‘ri tashlash tuproq va suv resurslarining ifloslanishiga sabab bo‘lishi mumkinligi, shu bois ularni alohida idishlarda yig‘ish, xavfsiz saqlash va belgilangan tartibda zararsizlantirish yoki utilizatsiya qilish zarurligi ta’kidlandi.
Shuningdek, avtomobillarga xizmat ko‘rsatish korxonalarida ekologik xavfsizlik talablariga rioya etish, chiqindilarni to‘g‘ri ajratish va boshqarish, ishlatilgan moylar hamda boshqa zararli moddalarni atrof-muhitga chiqarib yubormaslik yuzasidan tegishli tavsiya va tushuntirishlar berildi.
Ekoreyd jarayonida tabiatni muhofaza qilish borasidagi amaldagi talablarning mazmun-mohiyati tushuntirilib, xizmat ko‘rsatish sohasida faoliyat yuritayotgan tadbirkor va ustalarning ekologik mas’uliyatini oshirish muhimligi qayd etildi.
Zero, avtomobil moylari kabi chiqindilarni beparvolik bilan tashlash nafaqat hududning sanitariya holatiga, balki tuproq, suv va boshqa tabiiy resurslarga ham salbiy ta’sir ko‘rsatishi mumkin. Shu bois har bir xo‘jalik yurituvchi subyekt o‘z faoliyatida ekologik xavfsizlik talablariga qat’iy amal qilishi lozim.
Mazkur ekoreyd yakunida mas’ullarga aniqlangan masalalar yuzasidan tavsiyalar berilib, chiqindilarni belgilangan tartibda boshqarish, ekologik talablarni buzmaslik va atrof-muhitga zarar yetkazishi mumkin bo‘lgan moddalarni xavfsiz tarzda bartaraf etish zarurligi yana bir bor ta’kidlandi.
Bunday amaliy tadbirlarning muntazam o‘tkazilishi tadbirkorlik subyektlarining ekologik mas’uliyatini oshirish, chiqindilarni to‘g‘ri boshqarish madaniyatini shakllantirish hamda hududlarda ekologik xavfsizlikni ta’minlashga xizmat qiladi.
O‘zbekiston Ekologik partiyasi Oltinko‘l tuman Kengashi raisi Iqboljon Burxonov.
