Ish vaqti: Dushanba - Juma 
Soat: 08:00-17:00

Bugungi kunda aholining turmush farovonligini oshirish, kambag‘allikni qisqartirish, fuqarolar uchun munosib mehnat sharoitlarini yaratish va oilalar daromadini ko‘paytirish davlat siyosatining ustuvor yo‘nalishlaridan biri sifatida belgilangan. Bu borada joylarda aholi bilan bevosita muloqot qilish, ularning muammolarini o‘rganish hamda mavjud imkoniyatlardan samarali foydalanishga yo‘naltirish muhim ahamiyat kasb etadi.

Prezidentimiz tomonidan belgilab berilgan vazifalar ijrosini ta’minlash, aholi o‘rtasida kambag‘allikni qisqartirish borasida amalga oshirilayotgan ishlarni keng targ‘ib etish maqsadida O‘zbekiston Ekologik partiyasi Andijon viloyati Kengashi raisi Xurshidbek Yusupov tomonidan partiyaning Paxtaobod tuman Kengashi bilan hamkorlikda navbatdagi uchrashuv tashkil etildi.

Tadbir Paxtaobod tumanidagi 33-sonli umumiy o‘rta ta’lim maktabida To‘qqizbog‘ mahallasi fuqarolari ishtirokida o‘tkazildi.

Uchrashuv davomida aholining ijtimoiy va iqtisodiy faolligini oshirish, kambag‘allikni qisqartirish, fuqarolarning bandligini ta’minlash hamda oilalar daromadini ko‘paytirish masalalari atroflicha muhokama qilindi.

Tadbirda so‘zga chiqqan O‘zbekiston Ekologik partiyasi Andijon viloyati Kengashi raisi Xurshidbek Yusupov mamlakatimizda aholi farovonligini oshirish va kambag‘allikni qisqartirish borasida amalga oshirilayotgan islohotlarning mazmun-mohiyati haqida fikr bildirdi.

Ta’kidlanganidek, kambag‘allikni qisqartirish faqat moddiy yordam ko‘rsatish bilan cheklanib qolmaydi. Eng muhim vazifa — fuqarolarga barqaror daromad manbaini yaratish, ularni kasb-hunarga o‘rgatish, mehnat bozorida talab yuqori bo‘lgan yo‘nalishlarga tayyorlash va tadbirkorlik faoliyatiga jalb etishdan iborat.

Shu nuqtayi nazardan, uchrashuvda fuqarolarning bandligini ta’minlash, mavjud imkoniyat va imtiyozlardan samarali foydalanish, tadbirkorlik faoliyatini yo‘lga qo‘yish hamda oilaviy daromad manbalarini kengaytirish bo‘yicha tavsiya va takliflar bildirildi.

Ayniqsa, o‘zini o‘zi band qilish imkoniyatlaridan foydalanish, kichik biznes va oilaviy tadbirkorlikni rivojlantirish, tomorqadan samarali foydalanish, kasb-hunarga ega bo‘lish va zamonaviy mehnat bozorida talab yuqori bo‘lgan mutaxassisliklarni egallashning ahamiyatiga alohida e’tibor qaratildi.

Shuningdek, fuqarolarni mavjud davlat dasturlaridan samarali foydalanishga yo‘naltirish masalasi ham muhokama qilindi. Davlat tomonidan yaratilayotgan imkoniyatlardan xabardor bo‘lish, tegishli tashkilotlarga murojaat qilish va berilayotgan ko‘maklardan oqilona foydalanish oilalarning iqtisodiy barqarorligini ta’minlashda muhim omil ekani ta’kidlandi.

Uchrashuv ochiq muloqot ruhida o‘tdi. Fuqarolar o‘zlarini qiziqtirgan masalalar yuzasidan savollar bilan murojaat qilib, bandlik, kasb-hunar o‘rganish, tadbirkorlikni boshlash va oilaviy daromadni oshirish borasidagi takliflarini bildirdilar.

Aholining taklif va murojaatlari tinglanib, ularni qo‘llab-quvvatlash, mavjud muammolarni o‘rganish hamda fuqarolarning bandligini ta’minlash yuzasidan tegishli tavsiyalar berildi.

Bunday uchrashuvlarning mahallalarda tashkil etilishi aholining muammolarini bevosita o‘rganish, fuqarolarga mavjud imkoniyatlar haqida tushuncha berish va ularni ijtimoiy-iqtisodiy faollikka undashda muhim ahamiyatga ega.

Men, O‘zbekiston Ekologik partiyasi Andijon viloyati Kengashi raisi sifatida, aholining farovonligini oshirish, kambag‘allikni qisqartirish va fuqarolarning munosib daromad topishi uchun yaratilayotgan imkoniyatlardan samarali foydalanish masalalariga doimiy e’tibor qaratish zarur, deb hisoblayman.

Har bir oilaning barqaror daromad manbaiga ega bo‘lishi, mehnat qilishi va o‘z imkoniyatlarini ro‘yobga chiqarishi nafaqat oilaning, balki butun jamiyatning iqtisodiy va ijtimoiy barqarorligiga xizmat qiladi.

Shu bois kelgusida ham mahallalarda aholi bilan uchrashuvlarni davom ettirish, fuqarolarning taklif va murojaatlarini o‘rganish, ularni kasb-hunar va tadbirkorlikka yo‘naltirish hamda bandligini ta’minlashga ko‘maklashish borasidagi ishlar izchil davom ettiriladi.

Aholi farovonligi — jamiyat taraqqiyotining muhim mezoni. Har bir insonning munosib mehnat qilishi va barqaror daromadga ega bo‘lishi esa farovon hayotning mustahkam poydevoridir.

Xurshidbek Yusupov,
O‘zbekiston Ekologik partiyasi
Andijon viloyati Kengashi raisi

Scroll to Top